വഴി വിളക്കുകള്‍ കത്താതിരിക്കുന്നത്........

പകല്‍ വഴി പിഴപ്പിച്ച പ്രണയത്തിന്‍റെ

വെളിച്ചവും പേറിയാണ്

രാത്രി ബാക്കിയാക്കുന്ന

നിശബ്ദതയുടെ ഒഴിഞ്ഞ ഇടങ്ങളിലേക്ക്

ജീവിതങ്ങള്‍ നടക്കുന്നത്...

ഒരിക്കലും തെളിയാത്ത വിളക്കു കാലുകള്‍

പിഴച്ച പ്രണയത്തിന്‍റെ കറുത്ത രാത്രികളെ

ഒരിക്കലും പ്രകാശിപ്പിക്കാറില്ല...

കൊഴിഞ്ഞു വീണ പ്രണയത്തിന്‍റെ ഒരു മുല്ലപ്പൂവ്

എപ്പോഴും ഈ വിളക്കു കാലുകള്‍ക്കിടയിലുണ്ടാവും...

തെരുവില്‍ ഇപ്പോളും പ്രകാശിക്കാത്ത

വിളക്കുകാലുകള്‍ക്കിടയില്‍

രാത്രി ജീവിതങ്ങള്‍

എന്നും മുടങ്ങാതെ

വെളിച്ചം വില്ക്കുന്നുണ്ട്...

ഒരു പകലിനെയെങ്കിലും വഴി പിഴപ്പിക്കാന്‍...